OFRECERÁ CATRO FUNCIÓNS EN COMPOSTELA, DO MÉRCORES 21 AO SÁBADO 24, ÁS 22.00 H.
Diego Anido estrea na Sala Nasa a peza 'Cascuda', en coprodución co CDG
[19/05/2008] A Sala Nasa de Santiago acolle esta semana -do mércores 21 ao sábado 24 de maio, ás 22.00 horas- a estrea de Cascuda, unha peza de creación de personaxes e atmósferas baseada na difusa fronteira que separa a tolemia da cordura, a cargo de Diego Anido en coprodución co Centro Dramático Galego. O creador galego asume tamén a dirección e a interpretación desta montaxe, na que conxuga as linguaxes de teatro de texto, clown e danza contemporánea.
Outros nomes importantes para a materialización desta obra son Alex Serrano, responsable da dramaturxia e posta en escena; Isabel Franco, do deseño de iluminación; Gonzalo Piña, do espazo sonoro; e Silvia Delagneau, da escenografía e do vestiario. Raquel Regueira colaborou na produción e Víctor Molina e Roberto Fratina, no asesoramento artístico.
Cascuda é o resultado dun longo proceso de traballo, investigación e formación de máis dun ano de duración, que se concretou en cinco meses de ensaios regulares na Areatangent de Barcelona e na sala L’Estruch de Sabadell. Asemade, realizáronse dous stages en Compostela cunha duración de 15 días cada un. O primeiro desembocou nun work in progress no Salón Teatro e o segundo, nunha residencia técnica na Sala Nasa.
Para o CDG, esta exhibición work in progress foi unha experiencia pioneira, xa que por vez primeira a compañía pública apostaba por un tipo de residencia onde ofrecía ao creador a posibilidade de traballar cos medios e recursos que lle proporcionaba un espazo escénico como o Salón Teatro.
Símbolo da conduta humana
Os insectos foron empregados ao longo da historia da literatura como referentes á hora de simbolizar todo tipo de condutas humanas. Neste sentido, as cascudas chamaron a atención de Anido por seren un dos animais máis desprezables de todos os que conviven nas cidades. Porén, teñen unhas características de tamaño, resistencia e axilidade que lles permiten descubrir lugares, así como instalarse e observar a vida humana desde os espazos máis segredos e subterráneos dun mundo ao que os humanos nunca poderán acceder. Ademais, cómpre anotar o coñecido dato de que serían, xunto coas ratas, as únicas poboadoras do planeta no caso de producirse unha catástrofe nuclear.
A obra tenta aproximarse aos posibles significados da palabra desprezo que adoitamos asociar á cascuda: desprezar como detestar, pero tamén como sinónimo de infravalorar. Este é o punto de partida conceptual para unha Cascuda como unha pantasma que, procedente de lugares subterráneos, segredos e privados, se manifesta como bufón que se ri da ollada humana: as cascudas como pensamentos que nos habitan e collen a forma do insecto do desprezo. A través dunha coidada composición escénica de carácter xestual e a partir do uso de obxectos cotiáns, Anido móstranos a historia de Eladio, un ser solitario encerrado nos seus pensamentos.
Máis alá da convención escénica
Diego Anido (A Coruña, 1976) é un dos creadores galegos máis relevantes dos últimos anos. O seu discurso artístico rompe coas fronteiras das disciplinas escénicas convencionais para elaborar propostas nas que a danza, o teatro, a performance e a música van da man para consolidar espectáculos totais e de alto nivel.
O seu primeiro contacto coa escena foi no teatro universitario e na compañía Nut Teatro. Formouse na escola Espacio Aberto de Santiago, combinando os seus estudos con cursos de clown, performance, mimo, bufón e danza contemporánea. Traballou como modelo publicitario e performer para outros artistas actuando en diversos espazos e desenvolvendo a súa faceta musical na desaparecida Taxi Driver, ao tempo que mantivo as súas colaboracións coas Ultranoites da Sala Nasa e na Festa do Circo. Reeducouse en anti-ximnasia e entrou en contacto con outras técnicas corporais actuais.
En 2004 estrea en Galiza o seu primeiro espectáculo en solitario, Paperboy. Ese mesmo ano trasládase a Barcelona, dirixindo o seu traballo cara ao movemento, o teatro-danza e o Butoh (unha técnica teatral de danza xaponesa). Entra a formar parte como residente da Plataforma Artísitca Areatangent, onde desenvolve varios proxectos, entre eles, a súa segunda peza en solitario, O alemán (2006), e a triloxía Autopsia (Cía. Sr. Serrano). Na actualidade reside e traballa en Barcelona, onde forma parte da agrupación Sr.Serrano e da compañía Raravis-Andrés Corchero-Rosa Muñoz.
As localidades para as funcións na Sala Nasa poden adquirirse a un prezo de 9 €, 7 € (para estudantes, desempregados e a través da web www.salanasa.com) e 5 € (tripulación da Nasa).
No hay comentarios:
Publicar un comentario